Si no supieras leel,
es una casa con cuadrus,
t´ansomas a la ventana
y verás al boticariu.

Con el morteru en las manus
preparandu medicinas
pa cural los enfermus
al estilu d´Argentina.

¿Ándi aprendió su carrera?
A costa de sus costillas;
dispués se vinu a su pueblu
a vivil con su familia.

A vivil con su familia
qu´así lo quisu el destinu,
que se gulviera a su pueblu
a bien cuial sus vecinus.

D´esta botica se surtin
Valdeobispu y Carcabosu.
Boticas de toas clasis,
hasta de parchis purosus.

Parchis que to lo curan
y que lo curan de veras;
curan hasta las costillas
rotas pol las borracheras.

Ya se terminó la obra
d´esta bien jecha botica,
to el que venga a vel´la
verá una casa bonita.

Iginio Calvo se llama
esi famosu albañil
qu´ha construíu la casa
pa´l boticariu vivil.

Si t´ansomas al pasillu
verás dos lindas cenefas
que preparó el albañil
con sus manus sin pereza.

Tamién verás baldosinis
de diferentis maneras,
y el poyu de las tinajas
debaju la´scalera.

Y el fogón está a la izquierda,
soltandu muy güén golol,
están preparandu´n gallu
pa lleval´lo al comeol.

En el corral de serenu,
ahí han puestu la solana,
jue andi cayó el andamiu
y queó debaju Juana.

La segunda jue la "Mosca";
quiso enseñalsi a volal
y se cayó de cabeza
en la´squina del corral.

No ha siu añu de desgracias
hay que ponelsi en lo justu;
aunqui ningunu murió
s´han llevau grandis sustus.

Ya se marchó el albañil
a pasal las Naviadis
andi está su familia
libri de enfermeadis.