Vusotrus no descansáis.
Los domingus, borracheras;
con las mujeris en casa
tenéis las grandis quimeras.

Pol las mañanas templanu
empezáis a jadel el jatu,
cuandu llega el mediudía
los ojus comu los gatus.

Los niñus al mediudía
llorandu pa merendal;
vusotrus en las tabernas
venga chupal y gastal.

Si no dejáis esus vicius
¿sabéis lo que va a pasal?
Muchas nochis la familia
s´acostará sin cenal.

Apartalvus de esus vicius,
os lo pidu pol favol;
ahora jadréis muchu dineru
y el cuelpu andará mejol.

Esus vicius c´abéis cogiu
con el vinu y la cerveza
los lunis pol la mañana
¡cómu tendréis la cabeza!

Echáis manu a la cartera
y la encontráis sin dineru;
os miráis unus a otrus
¡güena l´armau compañeru!

Quinci y quinci que son trenta
y cuatru más trenta y cuatru;
lo tenía preparau
pa compralmi unus zapatus.

Compraré unas alpargatas;
con ellas andu mejol;
¡muchu dineru ganamos
peru ca vez peol!

En las viñas de "Malpelu"
ponel parras y tendréis viñas
y al llegal el mes de Agostu
andaréis tos de vendimia.

Llevalvus tos comu hermanus
y unilvus comu los dientis,
y que no echéis en el olvíu
lo que mira pa´l alienti.

El pueblu de Valdeobispu
con güena arministración
será el pueblu más notabli
c´aya en toa la región.

Habrá fondas y teatrus,
comercius, jerreterías;
en el pueblo Valdeobispu
reinará siempri l´alegría.

Cini habrá a toas horas
y tamién plaza de torus;
y el día c´aiga corría
os pudréis divertil tos.

Habrá jotelis de primera
y ricus ultramarinus
y unas juertis borracheras
en tabernas y casinus.